RAT BHAR MUJH KO GHAM E YAR NE BAHADUR SHAH ZAFAR

  

 

رات بھر مجھ کو غمِ یار نے سونے نہ دیا

صبح کو خوفِ شبِ تار نے سونے نہ دیا

 

شمع کی طرح مجھے رات کٹی سولی پر

چین سے یادِ قدِ یار نے سونے نہ دیا

 

اے دل آزار تو سویا کیا آرام سے رات

مجھے پل بھر بھی دلِ زار نے سونے نہ دیا

 

میں وہ مجنوں ہوں کہ زنداں میں نگہبانوں کو

میری زنجیر کی جھنکار نے سونے نہ دیا

 

یاس و غم رنج و الم میرے ہوئے دشمن جاں

اے ظفر شب کو انہیں چار نے سونے نہ دیا

 

بہادر شاہ ظفر