آپ کا اعتبار کون کرے - داغ دہلوی

 

آپ کا اعتبار کون کرے

روز کا انتظار کون کرے

ذکر مہر و وفا تو ہم کرتے

پر تمہیں شرمسار کون کرے

ہو جو اس چشم مست سے بے خود

پھر اسے ہوشیار کون کرے

تم تو ہو جان اک زمانے کی

جان تم پر نثار کون کرے

آفت روزگار جب تم ہو

شکوۂ روزگار کون کرے

ہجر میں زہر کھا کے مر جاؤں

موت کا انتظار کون کرے

آنکھ ہے ترک زلف ہے صیاد

دیکھیں دل کا شکار کون کرے

وعدہ کرتے نہیں یہ کہتے ہیں

تجھ کو امیدوار کون کرے

داغؔ کی شکل دیکھ کر بولے

ایسی صورت کو پیار کون کرے

داغ دہلوی