اشک اپنا کہ تمہارا نہیں دیکھا جاتا - محسن نقوی

اشک اپنا کہ تمہارا نہیں دیکھا جاتا

ابر کی زد میں ستارا نہیں دیکھا جاتا

اپنی شہ رگ کا لہو تن میں رواں ہے جب تک

زیر خنجر کوئی پیارا نہیں دیکھا جاتا

موج در موج الجھنے کی ہوس بے معنی

ڈوبتا ہو تو سہارا نہیں دیکھا جاتا

تیرے چہرے کی کشش تھی کہ پلٹ کر دیکھا

ورنہ سورج تو دوبارہ نہیں دیکھا جاتا

آگ کی ضد پہ نہ جا پھر سے بھڑک سکتی ہے

راکھ کی تہہ میں شرارہ نہیں دیکھا جاتا

زخم آنکھوں کے بھی سہتے تھے کبھی دل والے

اب تو ابرو کا اشارا نہیں دیکھا جاتا

کیا قیامت ہے کہ دل جس کا نگر ہے محسنؔ

دل پہ اس کا بھی اجارہ نہیں دیکھا جاتا

محسن نقوی 

Mohsin Naqvi

Romantic urdu poetry, Sad Urdu Poetry, urdu poetry ahmed faraz, urdu poetry images, urdu poetry in English, urdu poetry in urdu, urdu poetry love, urdu poetry sad, urdu poetry sms,