عجیب خواہش ہے شہر والوں سے چھپ چھپا کر کتاب لکھوں - نوشی گیلانی

عجیب خواہش ہے شہر والوں سے چھپ چھپا کر کتاب لکھوں

تمہارے نام اپنی زندگی کی کتاب کا انتساب لکھوں

وہ لمحہ کتنا عجیب تھا جب ہماری آنکھیں گلے ملی تھیں

میں کس طرح اب محبتوں کی شکستگی کے عذاب لکھوں

تمہی نے میرے اجاڑ رستوں پہ خواہشوں کے دیے جلائے

تمہی نے چاہا تھا خشک ہونٹوں سے چاہتوں کے گلاب لکھوں

کبھی وہ دن تھے کہ نیند آنکھوں کی سرحدوں سے پرے پرے تھی

مگر میں اب جب بھی سونا چاہوں تمہاری یادوں کے خواب لکھوں

میں تنہا لڑکی دیار شب میں جلاؤں سچ کے دیئے کہاں تک

سیاہ کاروں کی سلطنت میں میں کس طرح آفتاب لکھوں

قیادتوں کے جنوں میں جن کے قدم لہو سے رنگے ہوئے ہیں

یہ میرے بس میں نہیں ہے لوگو کہ ان کو عزت مآب لکھوں

یہی بہت ہے کہ ان لبوں کو صدا سے محروم کر کے رکھ دوں

مگر یہ کیسی مصالحت ہے سمندروں کو سراب لکھوں

نوشی گیلانی

Noshi Gilani

Ajeeb khawhish hai sheher walon se chup chupa kar kitab likhoon,
Tumhare naam apni zindagi ki kitaab ka intisaablikhoon,

Woh lamha kitna ajeeb tha jab hamari aankhen gale mili theen,
Main kis tarah ab mohabbaton ki shikastagi ka azaab likhoon,

Tumhi ne mere ujaarr raston pe khawhishon ke diye jalaaye,
Tumhi ne chaaha tha khushhk honton se chahton ke gulaab likhoon,

Kabhi woh din they ke neend aankhon ki sarhadonse pare pare thi,
Magar ab jab bhi sona chaahon tumhari yaadon ke khawb likhoon,

Main tanha larrki dayaar -e-shab main jalaaon sach ke diye kahan tak,
Siyaah-kaaron ki saltanat me main kis tarah aftaablikhoon,

Qayaadton ke junoon main jin ke qadam lahuu se range huye hain,
Yeh mere bass main nahin hai ke logo ko izzat-maab likhoon,

Yehi bohat hai ke in labon ko sadaa se mehroom kar ke rakh doon,
Magar yeh kesi musaalahat hai samandron kosaraab likhoon..